Shares
facebook sharing button Share
twitter sharing button Tweet
pinterest sharing button Pin
email sharing button Email
sharethis sharing button Share

من يتحمل هذا الفشل

  • بواسطة Abowael --
  • التاريخ 2011/08/11 --
  • مشاهدة 87208

بدون مقدمات وبدون اختيار جمل وفقرات مدروسه
سؤال صريح من واحد على نياته

من يتحمل فشل بعثتنا في الاولمبياد

لماذا وليه وليش بدأنا نحس بفشلنا في الكثير من الامور وليه ما نجد محاسبة وعقاب للمتسببين

ياخي مانبي نحاسب الروس الكبار ماعليش هذولا فوق الحساب الرئيس العام لرعاية الشباب وسمو نائبه
ماحنا قيالين شي مانقولهم عطو الفرصه لغيركم .. نبيهم هم يحاسبون اللي تحتهم نبيهم يهمصون اذانهم يقرصون عليهم شوي

ماهو ملايين تولي بحلوقهم والنتايج حتى ميداليه من خشب ماحصلنا . ويش ناقصنا زند الرياضي منا يمشي عليه التيس
والواحد يتبحج كانه محقق للوطن شي ماحقق المؤسس الله يرحمه

والله يالربع ماني رياضي وشكلي جاي على شكل اربعه بالعربي ملوي اتلوي ولاينعرف انا جاي والا رايح يعني مبربخ اتبربخ
وانا والرياضه بينا عداوه ازليه .

وحتى يوم قيل لي واحكي علي من ام العيال كل يوم تقولي تراك ثقل بلا دفا صار لازم امشي رحت يم الممشى اللي مسويته البلديه وقمت اهف عليه كاني بطريق وقلت الحمدالله ابي اصير رشيق القوام وابيض وجهي ويافرحه ماتمتش ثاني يوم جيت لقيت الشباب هل الطويقيات منقزين سياراتهم على الممشى والبعض بعد داخل جوى ومفرشين ويلعبون بالوت .

طابت نفسي من الرياضه حاولت امشي بحوش البيت اللي منحتنا ارضه الحكومه الله يبيض وجهها مشيت اول خطوه نطحني الجدار وصارت رياضتي خطوه امام وخطوه للخلف ما كأني الا عسكري بطابور اضافي 
نرجع للموضوع

هالحين مافيه امكانيه محاسبة المقصرين وتشكيل لجنه لتوضيح سبب اخفاق بعثتنا في الالومبياد 


لاتواخذوني توني ماخذ علاج حراره وشكل مفعوله تاخر شوي